Wasaaradda Ganacsiga, Warshadaha iyo Dalxiiska iyo Xarunta Dhaqanka ee Hargeysa waxa ay maanta si wadajir ah uga fuliyeen wacyigelin ku saabsan ka-hortagga Cudurka COVID-19 ee uu keeno Fayraska Karoona Goob-dalxiiseedka Laasgeel iyo tuulada Dhubbato, iyadoo farriinta la gaadhsiinayay dhammaan degmada Laasgeel.
Wacyigelintan oo Wasaaradda iyo Xaruntu ugu talogaleen dhammaan goobaha dalxiis ee Jamhuuriyadda Somaliland, maantana ka bilaabantay Laasgeel, waxa ay masuuliyiinta Wasaaradda iyo Xaruntu kula dardaarmeen shaqaalaha goobta iyo goobaha ganacsi ee tuuladaba feejignaan dheeraad ah, waayo waa goob la soo booqan doono markasta.
Xoghayaha Degmada Laasgeel, Mustafe Suudi Axmed oo ay weheliyaan hawlwadeennada caafimaadka ee degmada, Agaasimaha Waaxda Aataarta ee Wasaaradda Ganacsiga, Warshadaha iyo Dalxiiska, Ayaanle Cabdiraxmaan, Agaasimaha Xarunta Dhaqanka Iid Xasan, iyo hawlwadeennada Xarunta Jacfar Maxamuud Gaaddawayne iyo Sheekh Maxamuud Sheekh Dalmar ayaa kala hadlay bulshada Laasgeel farriimaha kala duwan ee wacyigelintu xambaarsanayd.
Ugu danbayn waxa wacyigeliyeyaashu ku wareejiyeen agab faraxal, nadiifin jidh, masarro afxidh iyo faragalisyo kala duwan oo u gaar ah shaqaalaha goobta dalxiis ee Laasgeel.
Wasaaradda iyo Xaruntu waxa ay ka sii wadi doonaan wacyigelin la mid ah tan goobaha dalxiis ee kale ee waddanka.