admin – Page 4 – Hargeysa Cultural Centre

Dhaxalreeb Magazine

Dhaxalreeb – Muraayadda Xarunta Dhaqanka ee Hargeysa, 2009-2018

Dhaxalreeb waa xogxejiye sannadkiiba dhowr goor uga soo baxa Hargeysa qaabab kala duwan (ku daabacan waraaq, ku qaybsan mareegaha PDF, ku codaysan cajalado). Tan iyo markii uu bilaabmay oo ahayd sannadkii 2009-kii, waxa uu ahaa muraayadda Xarunta Dhaqanka ee Hargeysa ee laga dheehan karo hawlaha dhaqan, shaxan, waxbarasho, fan, faaqidaad, xusuusxejin, dood-wadaag iyo kaydba leh ee ka socda Xarunta. Waana hage aqooneed oo ay ku soo baxaan qoraallo cilmibaadhiseed oo aan kalgal sugan lahayni.

Sannadkan oo Xarunta Dhaqanku marti gelin doonto Bandhiggii 11aad ee Buugaagta Hargeysa, 40-guuradii aasaaska Ururka Caalamiga ah ee Cilmibaadhista Soomaalida oo ku beegan Shirwaynihii 13aad iyo Furitaanka Rasmiga ah ee hoyga cusub ee Xarunta, Dhaxalreeb waxa uu isna yeelanayaa soo bixitaan joogto ah, tifaftire cusub iyo gole talineed oo ballaadhan.

Bandhigga Caalamiga ah ee Buugaagta Hargeysa waxa uu soo afmeeray tobankii sannadood ee u horreeyey ee ololaha dhigaalcurinta, akhriska iyo qoraalka noocayadiisa kala duwan. Ololahaas waxa baalal u ahaa Bandhigga Hargeysa iyo Buugaagta Wareegta, oo iyada oo la kaashanayo Naadiyada Akhriska, lagu dhiirri gelinayay in waddanka laga furo rugo wax akhris meel kasta. Guusha ololahaasi waa mid muuqda oo tirada buugaagta la soo saaray ee Soomaaliga ku qoran iyo goobaha wax akhriska magaalooyinka dalku ba ay aad u koreen. Tiro ahaan markaa meel wanaagsan baynu maraynaa.

Tobanka sannadood ee hadda bilaabmay waxa ay hawlwadeennada Xaruntu xoogga saari doonaan tayaynta, mar haddii tiradii meel wanaagsan i noo marayso. Dhaxalreeb wejigiisa cusubna waxa uu ka turjumayaa tayaynta qoraalcurinta iyo waxqorista, waxaana aan ku han weynahay in uu noqon doono maraggii isbeddelka tayadaas.

Akhris wanaagsan

DhaxalReeb Final

admin February 19, 2018

Featured

Carrada ayaan dhunkannay (Audiobook)

[Download the AudioBook from here]

We Kissed the Ground is the dramatic firsthand account of a migrant’s journey from Somaliland to the Mediterranean. When Mohamed Hussein Geeldoon’s story was first published by the Rift Valley Institute in 2017, the Somali author Nuruddin Farah commented:

‘This is a vivid account—one of the best I’ve come across—of what it is to be a Somali migrant in pursuit of a safer future elsewhere, away from the precarious life in the Somali Peninsula.’

The Rift Valley Institute and Redsea Cultural Foundation have collaborated to publish We Kissed the Ground as an audio book.

“Geeldoon’s story was collected during our research on the impact of war on Somali men”, explains RVI Director Mark Bradbury. “We felt it is such a powerful story – a story of our time – that it deserves to reach a wide audience. Mohamed agreed and has subsequently used the publication to speak with young Somalis considering the journey. We are grateful to the Redsea Cultural Foundation and the Hargeysa Cultural Centre for producing this audio version of book so it can reach even more young Somalis.”

Dr. Jama Musse Jama, Director of the Hargeysa Cultural Centre considers the production of first Somali audio book is an important milestone for Somali literature. Its launch takes place on the UNESCO International Mother Language Day on 21st February, which is not only symbolic but fittingly reaffirms the commitment of the Redsea Cultural Foundation and its Centre to promote Somali literature, language, culture and arts. “Access to high quality literature in mother tongue through audio books for an oral society like the Somali one in Somaliland is a win-win situation” says Dr. Jama Musse. “Indeed, we are planning to publish new books in this platform before the 11 Anniversary of Hargeysa International Book Fair this year,” concludes Dr. Jama Musse.

admin February 19, 2018

Featured

Tartanka Sheeko iyo Shaahid

Sheeko iyo Shaahid: Baratan Suugaaneed – 2018

Tartankii 10aad

Bandhig

Seeska Hiddaha iyo Dhaqanka (Redsea Cultural Foundation) iyaga oo ka duulaya fikradda aasaaska u ah jiritaankooda oo ah inay ka qayb qaataan wax kasta oo horumarinaya taabbagelinta dhigista, fidinta hiddaha iyo suugaanta; xoojinta fanka iyo farshaxanka; baahinta dhaqanka qorista iyo akhriska iyo gaar ahaan kobcinta qoraalka Af-Soomaaliga, waxa ay soo ban dhigayaan Kulankii Tobnaad ee ku baratanka Sheeko curinta Toolmoon, “Sheeko iyo Shaahid”.

Sheekooyinka ka soo qayb galayaa ma aha isku ujeeddo, mawduuca sheekadu ku socoto waxa u madax bannaan qoraaga. Waxa se sannadkan lagu dhiirri gelinayaa Sheeofaneedda.

Waxa halkan ku lifaaqan xeerka Sheeko iyo Shaahid ee sannadkan 2018.

Xeerka

Tartanka “Sheeko iyo Shaahid” waxa qeexaya xeerkan.

Waxaa lagu tartamayaa sheeko Af-Soomaali ku qoran oo aan hor daabicin. Ka-qaybgalka tartanku waa lacag-la’aan; waxana uu u furan yahay qof kasta iyo da’ kasta.
Tartanku waxa uu u furan yahay Sheeko male-awaal ah oo kaliya. Nuxurka sheekada qoraaga ayaa u xor ah. Waana sheeko aan hore loo daabicin (buug ahaan, degellada internetka iyo wargays toona).
Qof kastaa waxa uu ku tartami karaa hal sheeko oo keliya.
Waxa lagu tartamayaa Sheeko Dheer. Qoraalku waa in uu noqon karo buug, haddii hadhow la daabacayo. Qeexidda la siiyey Sheeko Dheeri waa in aan qoraalku ka yaraan 36000 oo xaraf oo u dhiganta 20 bog (boggii waxaa loo xisaabinayaa inuu yahay 30 sadar oo min 60 xaraf ah, qiyaastii 1800 oo xaraf boggiiba). .
Qoraalka waxaa la soo raacinayaa waraaq gaar ah oo ay ku cad yihiin:

1. magaca qoraaga (ama qoreyaasha),
2. cinwaanka laga la soo xidhiidhayo (oo ay ku jiraan ugu yaraan lambarka telefoonka gacanta (mobile) ama e-mail midkood),
3. taariikhda iyo meesha dhalashada,
4. magaca sheekada uu ku tartamayo.

Waxaa kale oo waraaqdaa lagu soo qorayaa caddayn uu qoraagu saxeexay oo uu ku caddaynayo inuu u yahay qoraaga rasmiga ah ee sheekada curiyey, islmarkaan uu akhriyey, aqbalayna dhammaan farqadaha xeerkan.

Habka iyo goorta qoraalka lagu soo gudbinayo:
1. Qoraalka waxaa lagu soo gudbin karaa gacanta isaga oo daabacan oo aanay dusha kaga qornayn magaca qoraaga iyo astaan kale toona; waxaa bogga kowaad lagu qorayaa cinwaanka sheekada. Waxaa la soo raacinayaa gal xidhan oo ay ku qoran tahay warbixinta ku cad farqadda 5aad. Waxaa la keenayaa cinwaankan: Xarunta Dhaqanka ee Hargeysa, Waddada 26ka Juun, Shacabka, Hargeysa, inta ka horreysa 8.00 habeennimo ee 15/04/2018.
2. Qoraalka waxaa iyana lagu soo gudbin karaa isaga oo elegtaroonig ah (pen drive, floppy disk ama se e-mail). Waa inuu qoraalku ku qoran yahay qorme caadi ah (text file editor, tex, MS Word, iwm). Waxa bogga kowaad lagu qorayaa cinwaanka sheekada. Waxaa la soo raacinayaa e-mail gaar ah oo gudihiisa ay ku qoran yihiin dhammaan xogta ku cad farqadda 5-aad. Waxa e-mailka loo soo dirayaa inta ka horraysa 12.00 habeenimo ee 16/04/2018 emailka sheeko@redsea-online.org, loona dirayaa nuqul kale info@hargeysaculturalcenter.org. Qofku waa inuu hubiyaa in e-mail kiisa la helay. Haddii aanu jawaabtaas ku helin muddo saddex cisho ah, waa inuu gacanta ka keenaa sida ku cad farqaddan sare. Haddii aanay suuragal ahayn inuu gacanta ka keeno, waa in uu ka eegaa cinwaanka internetka www.hargeysaculturalcenter.org iyo www.redsea-online.com halka laga la soo xidhiidhayo tartanka oo teleefon u soo diraa.

Qoraalladu waa inay soo gaadhaan Cinwaannada Xoghaynta (sida ku cad labadan farqadood ee qodobkan 6) inta ka horraysa 12.00 habeennimo ee maalinta Isniinta 16-da bisha afraad 2018 (xilliga Somaliland). Wax allaale wixii soo gaadha xilligaa dabadeed, kama qayb galayaan tartanka.

Qof kasta oo la aqbalo codsigiisa ka-qaybgalka tartanka waxa la ogaysiin doonaa inta ka horraysa 17/04/2018 in uu yahay tartame; lanana socodsiin doonaa halka uu kala xidhiidhayo faahfaahin dheeraad ah.
Guddiga Qiimaynta
Guddi ka kooban ugu yaraan 3 qof (iyo ugu badnaan 5) ayaa loo saari doonaa qiimaynta sheekooyinka; guddigaasi waxay soo qiimayn doontaa darajada sheeko kastaa hesho iyo ku-guulaystaha kaalinta 1-aad, iyagoo aan ogayn cidda qortay sheekada.
Darajadaasi waxay ku salaysnaan doontaa: bilicda suugaanta; heerka Af Soomaaliga qoran cilmi ahaan; heerka cabbirka mala-awaalka iyo tiraab-wanaagga qoraaga.
Tartame kasta oo toos ula xidhiidha guddiga qiimaynta inta aan lagu dhawaaqin go’aanka, waxay keeni kartaa lumis xuquuqda tartame.
Ehelka tooska ah ee xubin ka mid ah Guddiga Qiimayntu ma tartami karaan, haddii aanu xubinta Guddiga Qiimayntu ka tanaasulin xubinnamadeeda marka ay xubintaasi ogaato in qof ehelkeeda ahi soo tartamay.
Go’aanka Baratanka:

Guulayastaha tartanku waxa uu heli doonaa:

Astaan (billadda kowaad) oo qoraaga magaciisu ku xardhan yahay, 1000USD oo lacag caddaan ah, iyo heshiis daabicista buugga (Publishing Contract) oo uu kala heeshiyo soo saaraha Ponte Invisibile (buugfidiyaha Seeska Hiddaha iyo Dhaqanka).

Go’aanka Guddigu waa kamadambays aan laga ashkatoon karin. Guddiga, oo ka koobnaan doonta xeeldheerayaal suugaanta iyo Af-Soomaaliga, waxaa si gaar ah loogu magacaabayaa qoraal kale oo aan dadka la la wadaagi doonin si loo yareeyo saamaynta Guddida kaga iman karta dadweynaha. Waxa lagu guubaabinayaa baratamayaashu in aanay haba yaraatee la xidhiidhin guddida qiimaynta, xitaa si kama’ ah u ogeysiinin mid ka mid ah Guddida, sheekadooda wax lagu garan karo. Eeg qodobka 8c.
Bandhigga Go’aanka
Laba toddobaad ka hor ku dhawaaqsita guulaystaha, Guddigu waxa ay shaacin doonaan qoraayada u gudbay wajiga labaad ee baratanka (shortlisted)
Ku-dhawaaqista go’aanka tartanka waxaa lagu beegayaa Bandhigga Caalamiga ah ee Buugaagta Hargeysa ee sannadkan.
U-gudbayaasha wejiga labaad ee tartanka waxaa si gaar ah loogu marti qaadayaa Xafladda Bandhiga Go’aanka baratanka.
Waxaa xafladda lagu soo marti qaadayaa warbaahiyayaasha waddaniga iyo kuwa kaleba.
Xuquuqda Qoraalka (Copyright) ee sheekooyinka
Xuquuqda Abuurka Qoraalka (intellectual property copyright) waxay mar kasta u dhawran tahay qoraaga sheekada.
Sheekooyinka tartanka ka qayb gala oo dhan maamulka tartanku wuxuu ku sii faafin karaa, kuna daabici karaa buug ahaan ama ku soo saari karaa wargaysyada, degellada internetka, joornaallada iyo si kasta oo uu maamulku markaas u arko wanaag, isaga oo mar kasta xusaya lahaanshaha sheekada ee qoraaga hal abuuray iyo inay ka qayb gashay tartankan.
Sheekada guulaysata qoraageedu waxa uu xaq u leeyahay heshiis daabacadeed caalami ah oo uu la galo Seeska Hiddaha iyo Dhaqanka. Xeer baa qeexaya heshiiska daabacadda buugga ee ay wadagalayaan qoraaga iyo soosaaruhu.
Ka-qaybgalka tartankani wuxuu ku farayaa oggolaanshaha farqad kasta oo xeerkan ka mid ah. Faahfaahin dheeraad ah ka eeg: http://www.hargeysabookfair.com, http://www.redsea-online.com, http://www.hargeysaculturalcenter.org amase u qora e-mail info@hargeysabookfair.com.

RSOL/K – 001/18 International 14/02/2018

admin February 16, 2018

Articles Featured

Hawlaha Ka Baxsan Xarunta Gudaheeda

In kasta oo ay shaqada inteeda badan ka dhacdo Xarunta Dhaqanka gudaheeda, haddana waxa khasab ah in mararka qaarkood laga gudbo xadka magaalada iyo ka dalkaba. Safarradani waxa ay noqon karaan kuwo aqoonkorodhsi iyo kuwo tababarro cid kale la siinayo ah labadaba. Safarradaas waxa ka mid ah kii u dambeeyey ee bishii 12-aad 2017 lagu tegay Kigali, Rwanda. Caasimadda Rwanda ee Kigali waxa isugu imanayey dhowr iyo labaatan qof oo isugu jira halabuur iyo ururro halabuurka dhiirri geliya ama siyaabo kala duwanba ula shaqeeya. Arrinta xiisaha leh ayaa ahayd in ay dhammaantood xiisaynayeen in ay wax ka ogaadaan Xarunta Dhaqanka ee Hargeysa oo ay in badan warkeeda maqleen. Waxa dhacaysay in xiisaha loo qabo Xarunta iyo gebi ahaanba Somaliland uu hadheeyo ururradii kale ee dhiggooda ahaa. Wax la kaydsado dad baa u mudan, Xaruntuna waxa ay rejaynaysaa in dhowaan la arki doono midhaha ka dhasha wadashaqaynta halabuurka Afrikaanka ah iyo Xarunta Dhaqanka ee Hargeysa.

admin January 15, 2018

Events Featured

Tababbarka Digital Storytelling

In ay bulsho yeelato muuqbaahiye aan ahayn ka guryaha yaalla, balse ah mid si fudud looga heli karo Baraha Bulshada, dhowr daqiiqo gudahoodna ku gudbin kara macluumaad muuqaal ballaadhan bixinaya, ayaa noqotay lagamamaarmaan tobankii sanno ee u dambeeyey. Qodobkani waxa uu ahaa mid lagaga horreeyo Somaliland, welina wuu yahay. Nasiibwanaag waa ay joogaan sawirqaadayaal caan baxay oo dunida laga yaqaanno, laakiin Somaliland ma laha kuwo la mid ah oo maqal iyo muuqaal u gudbin kara habka casriga ah ee maanta la adeegsado.

Tababbarkani waxa uu ahaa mid taas wax ka beddeli karaya, soona saari kara dad aqoonta “Digital Storytelling” leh.

Waxa is diiwaan geliyey 30 dhallinyar ah, yimidna maalintii tababbarka. Waxa casharkan bixinayey Princely H. Glorious oo ah muwaaddin reer Tanzania ah, balse muddo bil hawlo shaqo u joogey Somaliland, martina si gaar ah ugu ahaa Xarunta Dhaqanka ee Hargeysa. Princely waa sawirqaade khibrad dheer u leh tebinta sheekooyinka ee habka muuqaalka casriga ah. Maadaama oo uu marti u ahaa Xarunta Dhaqanka, waxa uu go’aansaday in uu ku darsado waxqabadka Xarunta, tababbarkan.

Waxa halkaas ka soo baxay dhallinyaro fahmay heerka ay ka gaadhi karaan mihnaddan, haddii qof ama laba ay ka soo baxaanna, ay wax badan ka beddeli karaan sida ay imika xaaladdu tahay.

admin January 15, 2018

Events Featured

Caweyska Suugaanta

Caweys ka mid ah kuwa loogu jecel yahay ayaa sidii looga bartay habeenkan madasha keenay saddex dhallinyar ah. Khadar oo aad caan ugu ah jacburka ayaa dhowr maanso goobta ka tiriyey, mid ka mid ahi ay ahayd baroordiiq uu u sameeyey, Alle ha u naxariistee, Macallin Xasan Cawaale. Hodan waxa ay ka maansootan tahriibka, Maariya Cismaanna jacaylka ayay maanso dheer ku xustay.

admin January 15, 2018

Events Featured

Daahfurka “50 Sheeko iyo Sheeko”

Maxamed Xasan Cali “Weji” waa suugaanyahan, murtimaal in badan ka soo shaqeeyay idaacadda Radio Hargeysa. Weji waxa uu aad caan ugu yahay curinta sheekooyinka gaagaaban, balse ay murtidoodu aad u cuddoon tahay. Waa laba shay oo aan inta badan la midayn karin, se uu isagu ku guulaystay, hibana u leeyahay. Konton sheeko oo ka mid ah sheekooyinkaas tirada badan, ayuu meel isugu geeyey oo uu habeenkan soo bandhigay.

admin January 15, 2018

Events Featured

YAASMIIN MAXAMED KAAHIN

Daaddihiso: Khadra Maxamed

Yaasmiin Maxaxmed Kaahin waa da’yarta suugaanyahanka ah, alliftana riwaayadaha. Yaasmiin waxa ay safar dheer ugu kacday gobollada waddanka oo dhan. Socodkeedu waxa uu isku xidhayey Awdal ilaa Sool iyo inta u dhaxaysa. Safarkeedu waxa uu daarraa bandhigga riwaayadda ay alliftay ee la yidhaahdo “Dhiifta waaya iyo dhallin warkeedii”. Taas waxa u dheeraa in ay gobol kasta u wadday maanso u gaar ah.

Socdaalkan oo muddo qaatay ayaa lagu soo gunaanaday caweyskan. Waxa goobta lagu daawaday muuqaal soo koobaya socdaalkeedii iyo wixii ay kala kulantay gobol kasta. Taas waxa dheeraa maansadii gobolka Maroodijeex oo ay ugu luuqaysay. Caweyska waxa dhextaal u ahaa heeso kaban ah.

admin January 15, 2018

Events Featured

Daahfurka Maansada “Xeer-ku-dirir” iyo Xasan Dhuxul “Laabsaalax”

Daaddihiso: Yaasmin Maxamed Kaahin

Xasan Saleebaan Dhuxul oo loo yaqaanno “Laabsaalax” waa aas-aasaha Xiddigaha Geeska, ahna halabuurka allifay heeso aad u badan oo ay qaadaan fannaaniinta kooxda iyo kuwo kaleba. Xasan waxa lagu bartay samaynta heesaha, haddii ay tahay ereyada iyo laxankaba. Balse caweyskan waxa uu soo bandhigayey maanso uu ugu magac daray “Xeer-ku-dirir”. Maansadan oo uu kula dardaarmayey hoggaamiyayaasha xisbiyada qaranka iyo dhammaan mas’uuliyiinta xilalka u haya dawladda, waxa daahfurkeedii ka soo qayb galay marti ay ka mid yihiin abwaanno xubno kale oo dawladda ka socday.

Maansada “Xeer-ku-dirir” waxa ay la hadlaysay bulshada reer Somaliland oo dhan, balse waxa ay si gaar ah ugu socotay qof kasta oo dadka xil u haya am araba in uu u qabto.

Waxa kale oo goobtaas joogay Xiddigaha Geeska oo halkaas ka qaaday heeso dhowr ah oo ay ka mid tahay heesta “Hankaagu ha dhaafo reer hebel.”

admin January 15, 2018

Events Featured

Caweyska Suugaanta

Daaddihiso: Khadra Maxamed

Sidee loo dheellitiri karaa golaha suugaanta ee dalka? Sidee ayaa se loo dhiirri gelin karaa hibooyinka aan la dhaadanayn ee dalka gobol walba jooga? Xarunta Dhaqanka ee Hargeysa ayaa waxa ay bilowday in ay saamayn ku yeelato arrintan, waxna ka beddesho sida ay imika tahay. Habeenka “Caweyska Suugaanta” ayaa ah mid ay u siman yihiin dhammaan dhallinyarta uu Ilaahay hibada u siiyey tirinta suugaanta, lab iyo dheddig, gobol kasta oo ay joogaanba.

Deeqa Nuux Yoonis, Maxamed Galaydh, Ibraahim Xagar iyo Cabdiqani Mandela waa dhallinyar ka mid ah kuwa maanta ay tahay in la siiyo masrax ay suugaantooda ku soo bandhigaan, lagana faa’ideysto. Caweyskan waxa ay afartoodu ku soo bandhigeen, dadka 300 kor u dhaafay ee fadhiyana ay la wadaageen suugaan dhinacyo badan taabanaysa. Haddii ay noqoto wadaniyadda, toosinta jiilka ay ka midka yihiin iyo dhanka jacaylka, intaba.

admin January 15, 2018

Events Featured

Author: admin